A Real Filharmonía de Galicia ofrece este xoves, 6 de xullo (20h), un concerto para achegar a música clásica ao público compostelán. Será na igrexa de Santo Agostiño e estará dirixido polo director titular e artístico da orquestra, Baldur Brönnimann. O acceso será libre e de balde ata completar o aforo do templo eclesiástico.
No recital interpretaranse a Abertura “A bela melusina” de Felix Mendelssohn, Masques et Bergamasques de Gabriel Fauré e a Sinfonía núm 35 en Re Maior “Haffner” de Wolfgang Amadeus Mozart.
Brönnimann volverá dirixir a Real Filharmonía no concerto das Festas do Apóstolo o vindeiro venres, 28 de xullo, na praza da Quintana.
Xira estival
Con este evento dará comezo a temporada estival da Real Filharmonía na que actuará en Santiago de Compostela e diversas localidades das catro provincias galegas.
O seguinte concerto será no Auditorio de Galicia o día 11 de xullo no festival Peregrinos Musicais e na mesma semana ofrecerase outro o venres 14 na praza da Igrexa de Lalín dentro do IV Xacobeo Clarinet Fest.
Xa o día 20 no Auditorio de Galicia, a Real Filharmonía actuará, dirixida por Alexis Soriano, na estrea de Oficio de Camiñantes, obra composta por Ricardo Llorca por encarga da Catedral de Santiago.
As seguintes citas serán o concerto xa mencionado das Festas do Apóstolo o 28 de xullo, o mércores 2 de agosto no IX Festival Hércules Brass no mosteiro de San Salvador de Celanova, o día 5 na praza do Tapal de Noia dentro da programación do Noia Harp Fest X para rematar o día 10 no X Festival Bal y Gay no Teatro Pastor Díaz de Viveiro.
