O director e clarinetista vienés Andreas Ottensamer será o protagonista do concerto que ofrece este xoves 11 de maio ás 20:30h a Real Filharmonía de Galicia no Auditorio de Galicia no que será o seu primeiro coa orquestra galega e que levará por título ‘Sen Palabras’.
No programa desta ocasión incluirase a Suite de Lobgesang e unha selección de Cancións sen Palabras, de Félix Mendelssohn, con arranxos do propio Ottensamer. A noite pechará coa Sinfonía núm. 1 en Sol maior, de Piotr Ilich Chaikovski.
Tres cuartos de hora antes do comezo, o director atenderá os asistentes que o desexen nunha nova edición de ‘Conversando con…’, o ciclo de faladoiros que promove a Real Filharmonía para que os amantes da música poidan coñecer de preto as impresións dos directores e solistas.
Andreas Ottensamer é desde 2011 o clariente principal da Filharmónica de Berlín e actúa como solista deste instrumento nas principais salas de concerto e orquestras de todo o mundo, ademais de convidado habitual en diversos festivais.
Desde a temporada 2020/21 tamén sobe ao podio como director, sendo moi solicitado desde aquela, e debutando con grande éxito en Asia e orquestras de toda Europa. Ademais, Ottensamer é director artístico do Festival de Bürgenstock, en Suíza.
Entradas á venda
Para este evento poden mercarse as entradas a un prezo de 15€ a través da web compostelacultura.gal, ademais dos despachos de billetes da Zona C, Teatro Principal e Auditorio de Galicia.
