martes, 07 de septiembre de 2010
Concerto da Liberdade A Real Filharmonía celebra o Día da Liberdade Prensa cun concerto en Ferrol

Con motivo da terceira edición do Premio José Couso de Liberdade de Prensa, a Real Filharmonía de Galicia ofrece un concerto o 2 de maio no Teatro Jofre da cidade de Ferrol, localidade natal do cámara de televisión falecido durante a guerra de Irak, en 2003. Trátase do único concerto que se celebra en España con motivo do día da Liberdade de Prensa e ao que se espera asistan xornalistas de toda a xeografía peninsular. O concerto, dirixido por Maximino Zumalave e con Javier Otero ao piano, inclúe a Impresión nocturna, do compositor coruñés Andrés Gaos, e o Concerto Emperador de Beethoven.

Organizado polo Colexio Profesional de Xornalistas de Galicia e o Club de Prensa de Ferrol, o galardón pretende homenaxear a todos aqueles xornalistas que cada ano son asasinados, maltratados ou privados dos seus dereitos como persoas e como informadores. O fallo do premio produciuse o pasado 13 de abril, e recaeu sobre o xornalista norteamericano John Lee Anderson, “polo seu compromiso cos valores democráticos e da dignidade das persoas e dos pobos”.

Jon Lee Anderson, que desenvolve o seu traballo no The New Yorker, ten publicados en España varios libros de lectura obrigada como son Una vida revolucionaria, biografía do Che Guevara, ou o impactante La caída de Bagdad, polo que obtivo o premio Reporteiros do Mundo.

Música para a liberdade
O evento súmase a unha serie de actos organizados na cidade departamental en torno ao 3 de maio, Día da Liberdade de Prensa. Dende o Club de Prensa desta cidade preténdese concienciar á cidadanía da importancia deste dereito fundamental coma alicerce para a construcción de calqueira sociedade democrática.

Dende a Real Filharmonía programouse un repertorio que quere facer a súa pequena homenaxe a esta data, e para iso incluis a Impresión nocturna, de Andrés Gaos, un dos compositores galegos máis sobranceiros. Esta peza, “profunda e enternecedora”, segundo os expertos, reflicte o carácter deste compositor precoz, que xa gañaba aos dez anos un premio como violinista. En 1896 fixou a súa residencia en Bos Aires, onde desenvolveu boa parte da súa obra. En 1917 compuxo Elegía para piano e violín, dedicada ao seu amigo Pau Casals. A súa última actuación na Coruña foi en 1927.
Como compositor, destacan obras como En las montañas de Galicia, Aires gallegos, Impresión nocturna, ou a canción Rosa de Abril, sobre o mesmo poema de Rosalía de Castro


PROGRAMA

Mércores, 2 de maio

Real Filharmonía de Galicia
Maximino Zumalave, director
Javier Otero, piano

Andrés Gaos, Impresión nocturna
L. v. Beethoven, Concerto para piano nº5, op.73 “Emperador”