Destino Latinoamérica é o título deste segundo programa da temporada Viaxes. Nesta ocasión a Real Filharmonía de Galicia proponnos un periplo musical que se iniciará en México coa obra Discovery do compositor Carlos Chávez (1899-1978).
A continuación soarán as 5 Neruda Songs de Peter Lieberson (1946-2011), un ciclo de cancións de amor realizadas sobre poemas de Pablo Neruda, que serán interpretadas pola mezzosoprano británica Sarah Connolly.
O concerto concluirá con Three Latin-American Sketches de Aaron Copland (1900-1990). Esta obra xorde da gran predilección que o compositor estadounidense sentía pola música de América Latina.
Antes da celebración do concerto, o público asistente terá a oportunidade de manter unha charla previa coa directora Joana Carneiro, ás 19:45 horas na Sala Mozart do Auditorio de Galicia.