Luz Casal e a Real Filharmonía de Galicia, xuntos de novo no Teatro Real de Madrid

Luz Casal e a Real Filharmonía de Galicia volverán realizar un proxecto xuntos o vindeiro 20 de xuño no Teatro Real de Madrid, ás 21:00 horas. O concerto celébrase no marco da sexta edición do Universal Music Festival, que se presentou esta mañá no propio Teatro Real.

A RFG repetirá xunto á artista e a súa banda o excepcional concerto ofrecido o pasado verán na Praza do Obradoiro dentro dos actos do Xacobeo 21-22, baixo a batuta do mestre Paul Daniel. Luz Casal cantará de novo os grandes temas do seu repertorio. “Foi un concerto único. O equipo e eu decidimos que foi a xira máis curta da miña vida porque acabou en dúas horas”, lembrou Luz durante a rolda de prensa. A cantante-compositora destacou ademais que ese concerto se converterá no seu primeiro álbum en directo.