Os dous espectáculos didácticos previstos para esta temporada pola Real Filharmonía de Galicia non poderán celebrarse debido ás extraordinarias restricións provocadas pola actual situación sanitaria.
Fiel ao seu compromiso educativo, a RFG realizará gravacións destes dous espectáculos: “Pangea: a paisaxe sonora do noso planeta”, co multiinstrumentista Abraham Cupeiro a finais de xaneiro, e “O grande Beethoven” en abril en colaboración co Serviço Educativo da Casa da Música de Porto para conmemorar o 250º aniversario do xenial compositor.
A partir destas dúas gravacións vanse crear unha serie de recursos didácticos, que poderán solicitar os centros educativos a través de comunicacion@rfgalicia.org.
Os concertos familiares asociados a estes dous concertos didácticos tampouco se celebrarán, co fin de garantir a seguridade dos rapaces e as súas familias.
