O aforo máximo permitido será de 700 persoas e será preciso acudir cunha antelación de 30 minutos. Para que o concerto poida chegar á maior cantidade de público posible, poderá seguirse tamén en directo por streaming a través da canle de Youtube da RFG.
Será unha gala lírica. Contará coas voces do tenor Pene Pati e da soprano Amina Edris. Durante a velada soarán algunhas das arias máis coñecidas das óperas máis famosas da historia da música como Carmen de Bizet, La Traviata de Verdi, Romeo e Xulieta e Fausto de Gounod, O elixir de amor de Donizetti, Thais de Massenet, La bohème de Puccini, Cavalleria rusticana de Mascagni, Madame Butterfly de Puccini, On the town e West side history de Bernstein.
Pene Pati e Amina Edris
O tenor neozelandés Pene Pati conquistou o mundo da ópera cos seus recentes debuts como Percy en Anna Bolena na Ópera Nacional de Bordeus, Romeo en Romeo e Xulieta na Ópera de San Francisco e Alfredo en La Traviata no histórico Teatro Bolshoi de Moscova. Como gañador do Primeiro Premio no Concurso Internacional de Aria Montserrat Caballé, foi convidado a formar parte dun concerto especial de celebración en 2019 dedicado á soprano no Gran Teatro do Liceo de Barcelona.
A soprano exipica Amina Edris logrou establecerse como unha das novas promesas no escenario operístico actual. Entre os seus recentes e próximas actuacións destaca o seu debut na Ópera Nacional do Rhin como Micaela en Carmen e na Ópera de Limoges como Violeta en La Traviata, así como o seu regreso á Ópera de París no rol da Tolemia en Platea. Ademais, gozará de novas estreas no Teatro dos Campos Elíseos e no Gran Teatro do Liceu e regresará á Ópera de San Francisco e á Ópera Nacional de Bordeus. Formouse na Universidade de Canterbury (Nova Zelandia), na Academia Internacional de Voz de Gales e no Conservatorio de Música de San Francisco.
