Os recursos didácticos desenvoltos con Abraham Cupeiro arredor do seu espectáculo “Pangea” xa están accesibles para a comunidade educativa. Trátase dunha viaxe sonora que percorre os cinco continentes e que descobre a extraordinaria diversidade cultural a través da música.
O multiinstrumentista galego introducirá aos rapaces na máxica sonoridade de diferentes instrumentos de vento como o hulusi, propio das minorías étnicas de China; o kuisi ou “gaita colombiana”, de orixe indíxena; o duduk, cuxas raíces se remontan aos tempos do rei armenio Tigran o Grande (95-55 a. de C.); o shofar, do que temos constancia desde hai uns 3.000 anos; a corna, un instrumento que na segunda metade do século XX xa estaba extinguido; ou o kárnix, unha trompeta celta da Idade de Ferro, entre outros.
Abraham Cupeiro recupera estes e outros instrumentos perdidos no tempo e emprégaos para crear novas sonoridades e imbricalos en músicas alleas a eles. Ofrece, xunto á Real Filharmonía de Galicia, un marabilloso mundo de novos sons.
