A Real Filharmonía de Galicia, no seu afán por achegar a música clásica a todos os cidadáns composteláns, realizará tres concertos este mércores 5, xoves 6 e venres 7 de outubro no Centro Cultural Santa Marta, Centro Comercial Área Central e na Igrexa de Conxo, respectivamente.
Os tres concertos serán ás 19:30h e con entrada libre ata completar cabida sen necesidade de recoller convites previamente.
Os recitais, que estarán dirixidos polo mestre Paul Daniel ofrecerán fragmentos da Sinfonía nº1 en Do Maior de Ludwig van Beethoven, a Sinfonía nº4 en La maior de Felix Mendelssohn e a obra Aux étoiles (Ás Estrelas) de Henri Duparc.
Estes serán os últimos concertos que ofrecerá a Real Filharmonía de Galicia antes de comezar a temporada de abono, que levará por nome ‘Escoitar o mundo’, o vindeiro xoves 13 de outubro no Auditorio de Galicia cun concerto dirixido por Can Okan e co pianista Fazil Say como solista, e tras o concerto ofrecido o pasado venres 30 de setembro dentro do proxecto de investigación Sensoxenoma22.
